Ndahet nga jeta Franz Beckenbauer/ Rama mesazh ngushëllimi: Legjendë e sportit

Kryeministri Edi Rama ka shpërndarë në faqen e tij të Facebook një postim ku shpreh ngushëllimet për ndarjen nga jeta të legjendës së futbollit Franz Beckenbauer.

Rama e cilëson futbollistin si një legjendë të gjallë të sportit, ndërsa shprehet se me ikjen e tij, ka ikur edhe një copë e bukur e fëmijërisë.

“Kaiser Franz ishte si një valltar i dalë nga koreografitë e mjeshtrave të baletit modern në qendrën e mbrojtjes së Gjermanisë, ku ngriti kupën e botës e më pas, si një personazh i letërsisë gjermane në këmbë përpara stolit të Bundesmanschaft-it, kur e udhëhoqi Gjermaninë drejt një tjetër kupe të botës.

Me ikjen e tij shuhet një tjetër legjendë e gjallë e sportit më të dashur në botë dhe shkëputet një tjetër copë e bukur e fëmijërisë sonë, atëherë kur futbolli ndërkombëtar ishte vetë bota në Shqipërinë e burgosur brenda mureve të komunizmit”, shkruan Rama.

Ish-futbollisti i njohur gjerman Franz Beckenbauer është ndarë nga jeta në moshën 78-vjeçare, ka konfirmuar familja e tij.

Beckenbauer gëzoi një karrierë të gjatë në futboll edhe si lojtar, edhe si menaxher pasi kaloi në sistemin e të rinjve të Bayern Mynih në vitin 1964. Ai luajti për ekipin bavarez, në qytetin ku lindi, për 13 vjet duke fituar trofe të panumërt.

LEXONI GJITHASHTU:

• Ndahet nga jeta Franz Beckenbauer/ Rama mesazh ngushëllimi: Legjendë e sportit
• Ndahet nga jeta në moshën 100-vjeçare aktorja e “Mary Poppins”, Glynis Johns