Ndërhyrjet në sistemin TIMS, Prokuroria dërgon në gjyq ish-drejtorin e IT në polici

Prokuroria pranë Gjykatës së Shkallës së Parë të Juridiksionit të Përgjithshëm Tiranë, përfundoi hetimet dhe dërgoi në gjyq Ervin Muçën, ish-drejtorin e IT në polici aktualisht me masë sigurimi ‘Arrest në shtëpi’ i cili akuzohet për ndërhyrje në të dhënat TIMS të Policisë së Shtetit.

Nga tërësia e veprimeve hetimore rezultoi se i pandehuri në lidhje me procedurat e backup dhe ekstraktimin e të dhënave, nuk ka informuar Drejtorin e Përgjithshëm të Policisë së Shtetit, nuk ka një informacion, memo informuese, plan veprimi për problematikat e konstatuara dhe veprimet e ndërmarra për rregullimin e tyre.

“I pandehuri Ervin Muça, ka urdhëruar punonjësit për hapjen e portave USB. Veprimet janë kryer prej tij deri në orët e vona të natës dhe në godinë janë futur persona të paautorizuar për të asistuar në procesin e back up, konkretisht shtetasi K. M; jo pjesë e stafit, shpeshherë ka hyrë me pinin personal të një punonjësi tjetër jo prezent.

Gjithashtu, vërtetohet qartësisht lidhja midis pajisjes hard disk të sekuestruar me kompjuterin e identifikuar të lidhur me serverat; lidhje e realizuar për të mundësuar kryerjen e një procesi back up manual, duke eksportuar të dhëna në hard disk. Proces, i cili nuk ka pse të kryhet pasi vetë sistemi automatikisht bën dy back-up-e, për më tepër në pajisjen hard disk të sekuestruar evidentohen gjurmë të procesit të back up. Sa më sipër, hyrja e paautorizuar kompjuterike është realizuar. Pas hapjes së portave USB, procesi i back up ka filluar, vijuar, por nuk është përfunduar plotësisht.

Lidhur me veprën penale të “Shpërdorimit të detyrës”, është vendosur ndarja e çështjes”, bën me dije Prokuroria.

Vepra penale për të cilën është marrë i pandehur Muça parashikon një dënim nga 3 deri në 10 vite burgim.

LEXONI GJITHASHTU:

• Nga skandali i TIMS tek ngjarja Pogradecit, dritëhijet e Rrumbullakut në 2 vite
• Mbyllet pa raport të përbashkët Komisioni TIMS, çështja i kalon Kuvendit për votim