Kryeministri Edi Rama në fjalën e tij në Asamblenë e PS u ndal gjatë në vrasjen e Egli Progës në Pogradec, ngjarje që i shoqërua me reagim të madh publik dhe politik.
Rama akuzoi opozitën dhe median se u mobilizuan të manipulojnë ngjarjen kriminale duke hedhur akuza të pabaza ndaj policisë dhe urgjencës.
“Në politikë dhe në media u mobilizuan ta manipulojnë ngjarjen kriminale të ndodhur në Pogradec. Me shpejtësinë marramendëse u prodhua një film i kronikës së zezë për të prodhuar të gjitha të pavërtetat e mundshme”, tha Rama.
Rama i cilësoi gënjeshtra të fabrikuara fjalët se autori i krimit kishte mbrojtjen e PS, ndërsa tha se viktima ishte anëtar i PS me teser.
“U tentua të thuhej se Policia kishte tentuar të fshihte krimin. U bërtit fort se ambulanca kishte vajtur me 40 minuta vonesë. Por edhe kjo ishte një gënjeshtër. U përhap përralla se autori i krimit kishte mbrojtje politike, ngaqë një dajë i tij, ishte eksponent politik në Pogradec. Edhe kjo ishte një gënjeshtër. Partia Socialiste nuk mbron as ministrat dhe jo më të mbrojë këtë dajën, që është i dënuar, dhe nuk ka asnjë lidhje sot me Partinë Socialiste. Viktima po, ishte anëtar me teser i PS-së, nuk ishte pronar lokali, por punonjës i OSHEE”, tha Rama.
LEXONI GJITHASHTU:
- Nis Asambleja e PS, Rama: Nisemi drejt përballjes për mandatin e katërt qeverisës
- PS mbledh Asamblenë në Durrës, Rama: Zgjedhim skuadrën për Shqipërinë 2030
