Nuk legjitimohen palët në gjyq, shtyhet seanca paraprake për dosjen “Toyota Yaris”

Është shtyrë seanca e parë paraprake për dosjen “Toyota Yaris”, ku bën pjesë edhe ish-kryeprokurori Aurel Zarka.

Shkak u bë moslegjitimimi i palëve, më konkretisht GJKKO la detyrë që avokatët e personave në kërkim të paraqesin prokurat e firmosura nga vetë të akuzuarit. Edhe vetë Zarka, që është i vetmi i arrestuar, nuk ishte i pranishëm në seancë, por përfaqësohej nga avokatët e tij mbrojtës. Seanca e radhës u caktua më datë 20 shkurt në orën 09:00, ku pas dëgjimit të palëve, togat e zeza do të vendosin për kalimin në gjykim ose jo të dosjes.

Çështja në fazën paraprake tashmë po shqyrtohet nga gjyqtari Erion Çela, pas dorëheqjes së Irena Gjokës për konflikt interesi, pasi kishte qenë trupa gjykuese në çështjen e sekuestros së dy makinave të Suel Çelës në kuadër të operacionit Forca e Ligjit, për të cilat vendosi lirimin e tyre.

Në kërkim për këtë dosje është ish-agjentja e BKH-së Erjona Daupaj, Astrit Vladi dhe avokati Radovan Çela. Prokurorët Klodian Braho dhe Altin Dumani e kanë ndarë dosjen në fraksione të tjera, ku vijojnë hetimet për persona të tjerë të përfshirë.

LEXONI GJITHASHTU:

• Nga “21 janari” te politikanët në përgjimet e Sky ECC, flet kreu i SPAK
• Hetimet për “Toyota Yaris”, Dumani paralajmëron Berishën. Çfarë thotë për Olsi Ramën