Paloka: Në primaret nuk do votojnë vetëm anëtarët e PD-së, por edhe simpatizantët

Kryetari i Këshillit Kombëtar të Partisë Demokratike, Edi Paloka deklaroi se pas mbledhjes së këshillit, u vendos që për kandidatët që do marrin pjesë në primaret, nuk do të votojnë vetëm anëtarët e kësaj force politike, por edhe simpatizantët.

Në një deklaratë për mediat nga selia blu, Paloka tha kryetarët e degëve, nuk do t’i ushtrojnë funksionet e tyre, teksa kandidojnë në primaret.

Ai u shpreh se gjatë kohës që ata do kandidojnë në primaret, funksionet do t’i ushtrojnë nënkryetarët e degëve.

Ndër të tjera, Paloka nënvizoi se në mbledhje u vendos që të mbetet balotazhi si proces në primaret.

“Ato që mund të konsiderohen risi nga primaret e fundit janë që në votime, që e përcakton statusi, në votime nuk do të marrë pjesë vetëm anëtarësia e PD-së, por do të marrin pjesë edhe simpatizantët e PD-së. U miratua propozimi i grupit të punës dhe i Kryesisë, sipas së cilëve, kryetarët e degëve që do të kandidojnë në primare, gjatë kohës që kandidojnë në primare, funksionet e tyre do t’i kryejnë një nga nënkryetarët e partisë, së degës. Gjatë primareve, kryetarët nuk do t’i ushtrojnë detyrat e tyre si kryetar.

Nëse do fitojnë në primare, do shpallen kandidatë zyrtarë të Partisë Demokratike për zgjedhjet lokale, statuti parashikon që ata menjëherë nuk janë në pozicionin  e kryetarit, por të kandidatit për pushtetin lokal. Nëse nuk fitojnë primaret, do të vazhdojnë të mbajnë postin e kryetarit të partisë. Me vendim, u vendos që balotazhi do të qëndrojë”, theksoi ai.

LEXONI GJITHASHTU

• Berisha: Të organizojmë revolta të fuqishme dhe paqësore
• ‘Urgjente ndryshimi i situatës’, Berisha-demokratëve: S’fitohet vetëm me aktivitete
• ‘Rithemelimi, detyrim madhor’, Berisha: PD ka nevojë për një ndryshim të madh