Parandalohet ngjarja kriminale, arrestohet 38-vjeçari për dhunë e kanosje ndaj gruas

Ndërhyrja e shpejtë e shërbimeve të Policisë, menjëherë pas denoncimit të një shtetaseje për dhunë dhe kanosje për jetën nga bashkëshorti i saj, ka parandaluar një ngjarje kriminale në familje. Policia ka vënë në pranga 38-vjeçarin që dhunoi dhe kërcënoi bashkëshorten e tij, si dhe posedonte armë zjarri, granata dore dhe municion luftarak në banesë.

Policia e Dibrës, në bashkëpunim me Forcën e Posaçme “Shqiponja”, u njoftuan nga një shtetase 38-vjeçare, e cila raportoi se bashkëshorti i saj po e dhunonte dhe kërcënonte për ta vrarë në banesën e tyre në fshatin Lishan, njësia administrative Luzni. Menjëherë pas denoncimit, policia ka arrestuar shtetasin me iniciale  E. M., 38 vjeç, banues në fshatin Lishan.

Gjatë kontrollit të banesës së tij, u gjetën dhe u sekuestruan një armë zjarri pistoletë, tre granata dore të montuara me kapsolla ndezëse, një krehër pistolete dhe një sasi municioni luftarak. Këto prova materiale u sekuestruan si pjesë e hetimeve.

Materialet procedurale u kaluan Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprat penale “Dhuna në familje”, “Kanosja” dhe “Mbajta pa leje dhe prodhimi i armëve, armëve shpërthyese dhe municionit.

LEXONI GJITHASHTU:

• Hungari: Nënat me më shumë se 2 fëmijë do të përjashtohen përjetësisht nga taksat
• GJKKO dënon me 1 vit burg ish-kryetaren e bashkisë së Libohovës, Luiza Mandi