Pas urimit ndaj Vangjel Tavos, Gjikuria deklaratë për procesin zgjedhor në Himarë

Petro Gjikuria i cili kandidoi përballë Vangjel Tavos në zgjedhjet për Himarën. Ka reaguar me anë të një statusi në Facebook lidhur me rezultatin e zgjedhjeve.

Kandidati i koalicionit “Bashkë Fitojmë” shkruan se në këto zgjedhje u përdorën metoda antidemokratike në të gjitha stadet e tyre ndërsa rezultati ishte produkt i transformimit të listës së zgjedhësve me qëllim përshtatjen e saj me interesat e kundërshtarëve.

“Patëm një betejë të madhe. Një betejë e cila ishte vazhdim i shumë betejave të mëdha që kanë bërë himariotët, sidomos vitet e fundit të udhëhequr nga Fredi Beleri. Kjo betejë ishte pararojë e betejave të ardhshme që do të thirremi për vendin tonë.

Në këto zgjedhje pamë metoda antidemokratike në të gjitha stadet e tyre. Rezultati ishte produkt i transformimit të listës së zgjedhësve me qëllim përshtatjen e saj me interesat e kundërshtarëve tanë, duke i dhënë mundësinë një ushtrie partiake të merrte pjesë në zgjedhje dhe njëkohësisht, duke u mohuar këtë të drejtë mijëra qytetarëve të Himarës, si dhe duke përfshirë shtetin dhe parashtetin. Qëllimi ishte patja e një tjetër kryebashkiaku të dobët, i cili do t’u shërbejë interesave të Edi Ramës dhe partisë së tij.

Dëshiroj të falënderoj të gjithë ata që ndihmuan në këtë fushatë elektorale për garën e bukur dhe të ndershme që bëmë. Beteja për të nesërmen e Himarës vazhdon”,-thuhet në reagimin e Gjikurisë.

Kujtojmë se më herët, Gjikuria ka uruar me anë të një telefonate kryebashkiakun e ri të zgjedhur të Himarës, Vangjel Tavon.

• Pas urimit ndaj Vangjel Tavos, Gjikuria deklaratë për procesin zgjedhor në Himarë
• Gjest qytetarie nga Himara, Petro Gjikuria uron Vangjel Tavon