Pas Veliajt dhe Metës, Arben Ahmetaj kërkon transmetim live të seancave për dosjen “Buka”

Pas rasteve të kryebashkiakut Erion Veliaj dhe ish-presidentit Ilir Meta, edhe ish-zëvendëskryeministri Arben Ahmetaj ka kërkuar që seanca gjyqësore për dosjen “Buka” të transmetohet drejtpërdrejt për publikun.

Avokati i tij mbrojtës, Henrik Ligori, ka deklaruar se shqiptarët duhet të kenë mundësi të ndjekin live procesin gjyqësor, duke theksuar nevojën për transparencë të plotë në shqyrtimin e çështjes.

Pjesë nga diskutimet në seancë

Avokati i Ahmetajt: Shpreh vullnetin e klientit që procesi të jetë publik. Kërkojmë që procesi të regjistrohet dhe të transmetohet drejtpërdrejt.

Dëshmitari Lirim Fezollari: Në aspektin e privatizimit të kësaj shoqërie janë ndjekur të gjitha procedurat e nevojshme. Ka qenë një ankand i hapur. Shoqëria ka qenë 49% private dhe 50% shtetërore. Kam arritur deri në 40% në pjesën private dhe më pas ka dalë për privatizim edhe pjesa e shtetit.

Prokurori: Si jeni bërë aksioner?

Dëshmitari Lirim Fezollari: I kam blerë aksionet. Ngjitur me të kam edhe kompaninë time. Kam kompani të krijuara nga viti 1992 deri në 2004.

Prokurori: A keni dijeni për nxjerrjen në ankand të kompanisë “Buka sha”?

Dëshmitari Lirim Fezollari: Jo, nuk kam dijeni.

Prokurori: Keni pasur kontakte me familjen Myderizi?

Dëshmitari Lirim Fezollari: Jam takuar një herë në një lokal. Ishin të interesuar për takim dhe kam shkuar. Nuk e kam kuptuar çfarë kërkonin, kishin pretendimet e tyre dhe nuk doja të hyja në ato biseda. Familjen Biceri i kam takuar disa herë dhe janë njerëz të qetë. U kam thënë gjithmonë që çështjet i zgjidhni në gjykatë.

Prokurori: Keni një komunikim… “Më telefono pak, Arben Ahmetaj jam”.

Dëshmitari Lirim Fezollari: Duhet të ketë qenë në vazhdën e çështjes së pullave fiskale. Është mesazh i vitit 2018–2019.

Avokati i Ahmetajt: Ankandi ku u zhvillua?

Në ambientet e shtetit, më duket në Ministrinë e Ekonomisë. Ankandi ishte publik, në garë nuk kishte konkurrencë.

Avokati: Shpallja e fituesit më 19 gusht 2015, si shkuan procedurat?

Dëshmitari Lirim Fezollari: Bëmë kontratat, urdhërpagesat etj. Pjesa e familjeve nuk është paguar, është ndarë nga pjesa tjetër. Pjesa e mbetur është ende edhe sot.

Avokati: Si ishte njohja juaj me Ahmetajn?

Dëshmitari Lirim Fezollari: Me Ahmetajn vetëm kur kemi pasur probleme me çështjen e pullave fiskale.

Avokati: SMS e parë është në nëntor 2019, katër vite pasi jeni shpallur fitues në ankand. Ju thotë: “Arben Ahmetaj jam, më telefono pak”.

Dëshmitari Lirim Fezollari: Nuk e kisha numrin e tij, s’di çfarë të them. Nuk kisha komunikuar më parë me të”.

Dosja “Buka” lidhet me akuzat për shpërdorim detyre ndaj Arben Ahmetajt ndërsa çështja pritet të vijojë në seancat e ardhshme, ndërsa kërkesa për transmetim live mbetet në shqyrtim nga gjykata.