Polemika në “San Siro”, Liverpool fiton ndaj Interit me një penallti të diskutueshme

Liverpool-i ka marrë një fitore me shumë vështirësi në transfertë ndaj Interit, në një ndeshje ku nuk munguan polemikat.

Një gol i mesfushorit Szoboszlai vulosi ndeshjen mes Interit dhe Liverpool-it, ku kampionët e Anglisë morën 3 pikët e radhës në Champions.

Një 90-minutësh i karakterizuar nga polemikat e vazhdueshme, kjo për shkak të vendimeve jo të zakonshme të gjyqtarit gjerman, Felix Zwayer.

Ky i fundit anulloi një gol të Liverpool-it, vendim që u duk i pasaktë, dhe si për të balancuar gjërat akordoi një penallti për të kuqtë në fundin e sfidës.

Një 11-metërsh që, sipas ekspertëve të futbollit, kurrsesi nuk mund të akordohej.

Gjithsesi, ajo gjë ndodhi dhe Szoboszlai e ktheu në gol, duke i dhënë fitoren të kuqve.

Në përgjithësi e gjithë ndeshja ishte në një ritëm mesatar, edhe pse pritej shumë nga të dyja ekipet, që janë ndër më të mëdhatë në kontinentin e vjetër.

Në duelet e tjera morën 3 pikët Barcelona, Bayern, Atletico Madrid dhe Tottenham. Surpriza e mbrëmjes ishte Atalanta, që mposhti në shtëpi Chelsean me shifrat 2–1.

Monaco, Marseille dhe Olympiacos po ashtu morën fitore, teksa ajo që bie në sy është se përgjatë së martës nuk u regjistrua asnjë barazim.