Policia thirrje protestuesve të lirojnë rrugët menjëherë: Ndryshe do ndërhyjmë

Policia e Shtetit ka kërkuar nga protestuesit e mbledhur pasditen e së enjtes në Tiranë për të protestuar kundër rritjes së çmimeve të shpërndahen menjëherë dhe të lirojnë rrugët.

Përmes një njoftimi për mediat policia thotë se nëse kjo nuk ndodh, punonjësit e Policisë do të ndërhyjnë në zbatim të ligjit për të shpërndarë protestuesit.

“Nisur nga situata e krijuar, veçanërisht në Tiranë, ku grupe të rinjsh vijojnë të kundërshtojnë thirrjet e Policisë për t’u shpërndarë dhe për të liruar rrugët, Policia e Shtetit bën thirrje që personat që kanë bllokuar rrugën të shpërndahen  menjëherë pasi punonjësit e Policisë do të ndërhyjnë në zbatim të ligjit për të shpërndarë protestuesit, me qëllim lejimin e lëvizjes së lirë të automjeteve dhe qytetarëve”, thotë policia.

Protestuesit pas gati dy orë qëndrim para Kryeministrisë janë drejtuar për në sheshin “Skënderbej”.

Pjesa më e madhe e protestuesve janë studentë dhe të rinj. Ata bëjnë thirrje për lirimin e protestuesve që janë shoqëruar në komisariate gjatë dy ditëve të fundit.

LEXONI GJITHASHTU:

• Protestuesit largohen nga ‘Zogu i Zi’, hapet qarkullimi i makinave
• Protesta kundër rritjes së çmimeve në qytetet e Shqipërisë