PS fiton në qarkun e Dibrës, Balluku: Ka qenë fushata më e bukur e jetës time

Belinda Balluku, përfaqësuesja politike e Partisë Socialiste në Dibër prezantoi fituesit në këtë qark duke thënë se kjo kishte qenë fushata më e bukur e jetës së saj.

Balluku u shpreh se gjithçka kishte shkuar e qetë dhe paqësore deri në momentin e fundit kur ishte heshtje zgjedhore dhe më pas qytetarët iu drejtuan kutive të votimit.

“Isha e bindur që Valbona Kola ishte zgjidhja e duhur për Klosin. Valbona Kola ishte ajo që Partia Socialiste do t’i ofrojë komuniteteve në Shqipëri, njerëz të punës, njerëz të ndershëm, njerëz që nuk janë larguar kurrë nga vendlindja e tyre, njerëz që e duan qytetin e tyre, që i duan njerëzit që i rrethojnë, njerëz që duan Shqipërinë dhe do të bënin gjithçka për ta çuar përpara. Valbona i plotësonte të gjitha këto kushte,” – u shpreh Balluku.

Ndërkohë fjalën e mbajti dhe Kola e cila është tashmë kryebashkiakja e re e Klosit.

“Përshëndetje të gjithëve! Faleminderit me zemër, çdo banori të bashkisë Klos duke filluar nga Xibri, nga Gurra, Klosi dhe Suçi. Faleminderit gjithashtu çdo socialisti klosian dhe çdo demokrati që i dhanë besën PS dhe garantuan fitoren e thellë duke treguar se vetëm me PS ecet përpara dhe me Edi Ramën.

Ne në Klos kemi shumë punë për të bërë për ta ndryshuar Klosin dhe me këtë skuadër të mrekullueshme që kemi këtu, që rrugëtuam drejt fitores, do të rrugëtojmë në 4 vitet e ardhshme për ta shenjuar edhe zhvillimin e Klosit me shkronja të arta duke u mbështetur te kryeministri i Shqipërisë zoti Edi Rama dhe zv/kryeministrja e Shqipërisë, zonja Belinda Balluku. Faleminderit të gjithëve,” – tha ajo.

LEXONI GJITHASHTU:

• Përfundon numërimi i votimit për Këshillin Bashkiak në Poliçan, PS fiton 13 mandate
• PS fitoi 6 bashki në qarkun e Gjirokastrës, Kumbaro: Do lexojmë edhe votat kundër