PS kërkon përjashtimin e Bardhit dhe Balliut: Penguan zhvillimin e seancës në Kuvend

Grupi Parlamentar i Partisë Socialiste ka kërkuar këtë të premte masë disiplinore për deputetët e Partisë Demokratike, Gazment Bardhi dhe Klevis Balliu, pas incidentit që ndodhi gjatë seancës plenare ditën e djeshme.

PS akuzon deputetët demokratë për bllokimin e foltores dhe përdorimin e gjuhës fyese, duke ndërhyrë disa herë gjatë fjalës së kryetarit të grupit parlamentar të PS-së, duke krijuar kaos dhe duke penguar zhvillimin normal të punimeve të Kuvendit.

Në kërkesën e saj, PS kërkon përjashtimin e Gazment Bardhit nga komisionet dhe seancat plenare për 10 ditë për shkak të pengimit të zhvillimit të seancës dhe përdorimit të gjuhës fyese, ndërsa kërkohet përjashtimi i Klevis Balliut për 30 ditë për sjellje agresive dhe dëmtimin e pajisjeve të Kuvendit, përfshirë mikrofonin dhe sistemin e votimit.