Punë dhe paga për të dënuarit, ja plani i qeverisë

Në emisionin Money në Euronews Albania këtë të shtunë u analizua situata në burgjet shqiptare.

Për të ulur kostot në burgje, disa sisteme mundësojnë punësimin e të dënuarve. Madje, e drejta për t’u punësuar është një ndër shqetësimet kryesore në listën e ankesave që ngrihen në qeli. Punësimi është një kontribut i rëndësishëm në rehabilitimin dhe përgatitjen për t’u integruar në shoqëri. Legjislacioni i vendit tonë parashikon jo vetëm punësimin e të burgosurve, por edhe shpërblimin me para për punën e kryer.

Avokati Julian Mërtiri, deklaroi se me numrin e lartë ë të burgosurve në Shqipëri është e vështirë të arrihet rehabilitimi i të dënuarve.

“Qëllimi kryesor i dënimit është rehabilitimi i të burgosurve, pra dënimi i tyre bëhet për një kohë të caktuar me qëllim që kur ata ta kenë përfunduar dënimin të rehabilitohen dhe të ri-integrohen në shoqëri. Me një kapacitet të tillë burgjesh që është maksimal vlerësoj se është shumë e vështirë që të arrihet qëllimi i rehabilitimit pasi në burgje nuk mund të realizohen ato veprimtari të cilat duhet të bëhen sa i përket të burgosurve, qoftë për aktivitetin e tyre të punësimit, aktivitetin kulturor, veprimtari të ndryshme të cilat ndikojnë edhe në dënimin e tyre, mënyrën e rehabilitimit të shpejtë”, tha avokati.

Punësimi i të dënuarve ka si qëllim jo vetëm fitimin dhe zhvillimin e aftësive për punë dhe njohuri profesionale, por nga ana tjetër shpërblimi u jep të burgosurve një ndjenjë pavarësie, të cilën e kanë humbur gjatë vuajtjes së dënimit dhe njëkohëshisht lehtëson barrën financiare të familjarëve me kushte të vështira.

Drejtuesja e Komiteteit të Helsinkit, Erida Skëndaj u shpreh se: “Përsa i takon punësimit, janë marrë nisma të cilat nuk e kanë arritur efektin, por di që ka nisma ku të dënuarit punojnë dhe shpërblehen. Por, ka nevojë për kurse profesionale, vende të reja punë për të paraburgosurit, të cilëve kjo punë përveçse i shpërblen, u shërbën për rehabilitim”.

“Është menduar që burgu i Kosovës në Lushnjë të kthehet në një burg të hapur, në një mjedis ku të dënuarit kryejnë punë në bujqësi apo blegtori”, ka njoftuar Drejtoria e Përgjithshme e Burgjeve.

LEXONI GJITHASHTU:

• Kosto e një të burgosuri në Shqipëri, 900 euro në muaj
• Burgjet private në Shqipëri, kush ka interes t’i ngrejë