Qafoku: Çështja Beleri nuk mund të bëhet problem për integrimin e Shqipërisë

Gazetari Roland Qafoku tha në një intervistë për Euronews Albania se çështja e Belerit nuk ka lidhje me një konflikt të mundshëm me Greqinë.

Sipas tij, kjo çështje nuk mund të bëjë që Greqia të vendosë veto për anëtarësimin e Shqipërisë në Bashkimin Europian.

Ai tha se nuk mund të flitet as për shkelje të të drejtave të njeriut pasi sipas tij shqiptarëve u janë shkelur të drejtat shumë herë, e askush nuk ka reaguar.

“Çështja Beleri është çështja Beleri, nëse Greqia kërkon gjilpërën në kashtë për të krijuar një problem me Shqipërinë, nuk shkon. Unë nuk e kam parë ndonjëherë Greqinë të shqetësohet kur i vunë shqiptarët si dele në ’95-’97 dhe i sillnin në Shqipëri.

Janë 250 shqiptarë  të vrarë nga këta emigrantë që kaluan kufirin me këmbë, e nuk kam parë të shqetësohet njeri, 40 prej tyre, ishin fëmijë. Mjafton kjo shifër dhe duhet reagim.

Nëse përmendim të drejtat e njeriut, të drejtat e njeriut i janë shkelur shqiptarëve, janë vrarë 244-245 shqiptarë dhe nuk është thënë një fjalë, për mos të thënë ato operacionet fshesa e të tjerë. Lëre çështjen e Çamërisë e të tjera. Nuk ka minoritar në Shqipëri që është persekutuar. Në vitin 2023 të flasim si në 2001 apo 2002”,-tha Roland Qafoku.

LEXONI GJITHASHTU:

• Greqia i drejtohet BE: Pa u zgjidhur çështja e Belerit, s’ka avancim të negociatave
• Përplasja Britani-Greqi për skulpturat, Gazetari: Cili është roli i Erdogan