Qëlloi me armë sportive macen në rrugët e Tiranës, arrestohet 39-vjeçari

Një 39-vjeçar është arrestuar nga policia e Tiranës pas publikimit në rrjete sociale të një videoje, ku ai shihej teksa qëllonte me armë sportive një mace në rrugët e kryeqytetit.

Policia bën me dije se shtetasi me inicialet S. K., u ndalua për veprat penale “Keqtrajtimi i kafshës”, “Prishja e qetësisë publike” dhe “Prodhimi dhe mbajtja pa leje e armëve të gjuetisë dhe sportive”.

Materialet procedurale në ngarkim të tij i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme procedurale.

“Në lidhje me një video të postuar në rrjete sociale, në të cilën shfaqet një shtetas duke keqtrajtuar një kafshë (mace), ju sqarojmë se:  Shërbimet e Komisariatit të Policisë Nr. 4, menjëherë pas publikimit të pamjeve filmike, organizuan punën për identifikimin dhe shoqërimin e autorit.

Në vijim të veprimeve, u shoqërua në komisariat shtetasi S. K., 39 vjeç, banues në Tiranë. Gjatë kontrollit në automjetin e tij, shërbimet e Policisë gjetën një armë sportive, e cila u sekuestrua në cilësinë e provës materiale”, njofton policia.

LEXONI GJITHASHTU:

• Ekskluzive/ Arrestohet këngëtarja e njohur Enca, kultivoi kanabis në banesë
• U arrestua për kultivim kanabisi në ballkon, zbardhet dëshmia e këngëtares Enca
• “Na quajti “plehra” e “mizerje”- gazetari denoncon pronarin e hotelit në Drimadhes