Rama: Kurtin e kam mik, por s’pajtohem me politikën e tij së fundmi

Kryeministri Edi Rama, ka deklaruar se politika në Kosovë ka bërë që Serbia të dalë nga ekrani dhe të duket si viktimë para bashkësisë ndërkombëtare.

“Tragjike! Serbia ka dalë nga ekrani. Duket sikur është viktimë. Para botës ata nuk janë viktima. Kush e ka përgjegjësinë për këtë? Nuk e ka bërë këtë një lëvizje inteligjente e Serbisë. Kjo është vepër e Prishtinës. I është dhënë Serbisë pozicion komod dhe këtu qeveria merr rrufetë e planetit”- tha ai.

Ndër të tjera Rama nënvizoi se me homologun e tij kosovar nuk ka asgjë personale por që nuk pajtohet me politikën që ai po bën së fundmi.

“Kjo politikë është bërë pengesë, politika e gabuar, nuk e kam fare me personin. Nuk e godas kryeministrin Kurti. Unë mbaj qëndrim ndaj politikës së caktuar. Nuk kam asgjë personale. E kam mik dhe është njeri me të cilin debatoj me kënaqësi”, ka shtuar ai, duke ironizuar me shprehjen e Kurtit se “Kosova është vendi më demokratik në Ballkanin Perëndimor”- është shprehur Rama, në Rubikon të Klan Kosova.

LEXONI GJITHASHTU: 

• Vrasja e kunatit të Bejtjas në Krujë, Valter Bami arrestohet si i dyshuar
• Abilekaj: Kurti s’ka arsye ta takojë Ramën, që të bëjë si flamurtar, gabimi që u bë