Rama tregon si do e nxisin sektorin privat për të rritur pagat mesatare

Kreu i qeverisë Edi Rama tha se po nxisin sektorin privat për të rritur pagat mesatare të punonjësve, duke qen se vendimi i qeverisë parashikon rritjen e pagave vetëm për administratën.

Në një dalje për mediat pas mbledhjes së qeverisë Rama tha se sektori privat detyrohet të rrisë pagat pasi rritja e pagave në sektorin publik do të tërheq drejt vetes burime njerëzore të kualifikuar.

Më tej ai tha se pagat në sektorin privat po rriten me shpejtësi.

“Është një proces i ndërthurur sepse rritja e pagave në sektorin publik rrit patjetër dhe aftësinë e sektorit publik për të thithur burime njerëzore më të kualifikuar. Nga kjo sektori privat do të jetë i detyruar të rrisë pagat. Sot pagat në sektorin privat  po rriten me shpejtësi. Sot jemi në një situatë ku kemi filluar një proces komunikimi me sipërmarrjen private për  të sensibilizuar sipërmarrësit lidhur me domosdoshmërinë, e mbrojtjes së kapitalit njerëzor. Ne jemi optimistë dhe shikojmë shenja pozitive nga sektorët private. Natyrisht do të marrim dhe masa tjera. Për ne nuk është vetëm rritje pagash por dhe mbrojtje e punonjësve dhe punëtorëve në kompani të ndryshme nga shfrytëzimi”- tha ai.

LEXONI GJITHASHTU: 

• “Becchetti”/ Rama: Po analizojmë daljen nga juridiksioni i Gjykatës së Arbitrazhit
• Kritikoi Kremlinin, prokurorët kërkojnë 25 vite burg për gazetarin rus