Rama zbulon letrën që i ka dërguar Macron dhe Scholz për Kosovën

Kryeministri Edi Rama deklaroi në një konferencë për media se për aq kohë sa 3 efektivët e Kosovës nuk lirohen është i pamundur përparimi në dialog apo de-përshkallëzimi i situatës.

Ai foli për një letër që i ka dërguar presidentit francez, Emmanuel Macron dhe kancelarit gjerman Olaf Scholz për tensionet në Kosovë.

“Dua t’iu informoj se pardje i kam nisur një letër të dytë, pas asaj të draft-statutit presidentit Macron dhe kancelarit Scholz, për dijeni edhe presidentit të Këshillit Europian Charles Michel lidhur me domosdoshmërinë e një shtyse të re, konkrete, të Francës dhe Gjermanisë si kumbarët e planit franko-gjerman, natyrisht me mbështetjen e Shteteve të Bashkuara në mënyrë që plani franko-gjerman të zbatohet me doemos,” – u shpreh Rama.

Sipas Ramës nuk mund të ketë normalitet as në marrëdhëniet mes Shqipërisë dhe Serbisë në këto kushte.

“Edhe nëse e kanë kaluar vijën e kufirit, sikur ta marrim të mirëqenë këtë pretendim dihet botërisht se në çdo legjislacion demokratik për kalim të paligjshëm të kufirit njerëzit arrestohen, pyeten dhe kthehen mbrapsht me masën e ndalimit të hyrjes në atë vend për një kohë të caktuar. Mbajtja e tyre me ditë të tëra në burg është e pajustifikueshme dhe është e papranueshme.

Përpjekja për ta mbuluar këtë lajthitje shtetërore për mbajtjen pas asnjë të drejtë të tre policëve të huaj në burgun e një shteti tjetër, duke ngritur zërin për arrestimet në veri të individëve të caktuar, të minoritetit serb nga forcat policore të Kosovës është tejet shqetësuese sepse shtetet demokratike nuk i përgjigjen kurrë në mënyrë simetrike shkeljeve të pretenduara të bashkëkombasve në një shtet tjetër,” – u shpreh Rama.

LEXONI GJITHASHTU:

• “S’ka përparim pa lirimin e 3 policëve”, Rama reagon pas takimit Kurti-Vuçiç
• Rama vizitë në kompaninë e Sigurisë Kibernetike në Izrael: Janë lidera botërorë