“Do presim vendimin e Kushtetueses”, Kuvendi reagon pas shtyrjes së mbledhjes për imunitetin e Ballukut

Kuvendi i Shqipërisë ka reaguar me një njoftim zyrtar në lidhje me shtyrjen e mbledhjes së Këshillit të Mandateve dhe Imunitetit, e planifikuar për t’u mbajtur këtë të mërkurë në mesditë lidhur me kërkesën e SPAK për imunitetin e zv.kryeministres Belinda Balluku.

Sipas njoftimit të Kuvendit, shtyrja bëhet pasi po pritet marrja dhe vlerësimi paraprak i vendimit përkatës nga Gjykata Kushtetuese. Kuvendi sqaron se kjo procedurë synon garantimin e një procesi vendimmarrjeje të plotë, objektiv dhe në përputhje me parimet kushtetuese, për të shmangur cenimin e sigurisë juridike dhe për të garantuar rregullsinë e veprimtarisë dhe vendimmarrjes së tij.

“Në mbështetje të nenit 73 të Kushtetutës, nenit 13, pika 5, dhe nenit 118 të Rregullores së Kuvendit, duke marrë parasysh kërkesën e anëtarëve të Këshillit gjatë mbledhjes së parë më 19.12.2025, është vendosur që shqyrtimi i kërkesës së Prokurorisë së Posaçme për Korrupsion dhe Krim të Organizuar lidhur me autorizimin për arrestimin ose heqjen e lirisë së deputetit/ministrit/zëvendëskryeministrit të lidhet me vendimin paraprak të Gjykatës Kushtetuese”, thekson njoftimi i Kuvendit.

Vendimi i shtyrjes u bë publik nga Këshilli i Mandateve dhe vjen pas një dite më parë, kur Gjykata Kushtetuese nuk mori ende një vendim lidhur me kërkesën e qeverisë për pezullimin e Ballukut nga detyra e zv.kryeministres.