Rey Manaj i pandalshëm, shënon golin e 18-të. Vlera i rritet miliona euro

Fundjava që lamë pas ishte e suksesshme për lojtarët e kombëtares shqiptare, të cilët po bëjnë mirë me skuadrat e tyre. Ashtu siç tanimë është bërë e zakonshme, Rey Manaj ka shënuar një tjetër gol me Sivasspor në kampionatin turk. 27-vjeçari numëron 18 gola të shënuar, 14 në kampionat dhe 4 në kupë. Edhe këtë herë në përballjen me Pendikspor, lushnjari rezultoi një lojtar kyç duke shënuar golin e 3-të në fitoren 4-1 në shtëpi.

Në përfundim ishte trajneri Bulent Uygun i cili i thuri elozhe futbollistit të kombëtares shqiptare, duke pohuar se ai vlen plot 15 milionë euro, e çdo skuadër e interesuar mund të hyjë në tratativa me këtë pagesë. Kujtojmë se Sivasspor e mori Manajn si futbollist të lirë dhe fitimi në një lëvizje të tillë do të ishte i madh. Një tjetër emër që premton shumë në Turqi është Ernest Muçi. Futbollisti i cili pak kohë më parë iu bashkua Besiktasit, arriti të gjente golin e parë në fundjavë ndaj Istanbulspor. 22-vjeçari luajti gjatë gjithë takimit, ndërsa në fraksionin e dytë realizoi me një gjuajtje të bukur nga jashtë zone.

Tek Inter, Kristjan Asllani asistoi në golin e parë ndaj Lecce, me një pasim të bukur nga mesfusha, ku nxorri zbuluar Lautaro Martinezin, që mposhti portierin kundërshtar. Elbasanasi u vlerësua me notën 7.7, ndërsa më mirë se ai ishin vetëm De Vrij, Lautaro dhe Fratessi.

LEXONI GJITHASHTU:

• Manaj dhe Uzuni konfirmojnë formën fantastike, shënojnë supergola
• Interi, “poker” ndaj Leçe, zikaltrit 19 ndeshje pa humbje në Serinë A
• Klopp fiton një tjetër trofe, Liverpool mposht në finale Chelsea