Riaktivizohet vatra e zjarrit në Fier, banorët: Po na digjen bagëtitë, të ndërhyhet

Riaktivizohet sërish zjarri në pyllin me pisha në Kraps të Fierit. Burime bëjnë me dije se flakët po përhapen me shpejtësi për shkak të terrenit ‘grykë’ dhe erërave të forta që favorizojnë shtrirjen e tyre në një sipërfaqe më të gjerë.

Drejtori i zjarrfikësve të bashkisë Fier, Zija Hyka pohon se situata është e vështirë ndërkohë që për neutralizimin e flakëve në terren ndodhen tre mjete zjarrfikëse.

Situata bëhet më e vështirë edhe për shkak të terrenit të vështirë, ndërkohë që vetëm dy ditë më parë shuarja e zjarrit u bë e mundur vetëm pas ndërhyrjes nga ajri pasi zjarri doli jashtë kontrollit duke u përhapur nga pylli drejt Krapsit.

Për shkak të përhapjes së shpejtë të flakëve situata po bëhet alarmante duke kërkuar përforcime nga Patosi e Rroskoveci , ndërkohë që ky zjarr i përmasave të tillë mund të kërkojë ndërhyrje dhe nga ajri.

Bëhet e ditur se në Kraps përveç sipërfaqeve me pisha dhe ullinj, flakët kanë përfshirë edhe disa banesa në zonën e sipërme të fshatit të cilat ndodhen në afërsi të pyllit.

Sipas banorëve mund të jenë djegur dhe bagëtitë.

“U dogjëm, zjarri ka ardhur tek shtëpitë. Duam që shteti të na ndihmojë, s’kemi ça të të bëjmë”

“Nuk shuhet zjarri me dorë. Era po e ndihmon zjarri. Po digjen shtëpitë dhe bagëtitë, lere më barin. Zjarri fiket vetëm nga ajri”- shprehen banorët.

LEXONI GJITHASHTU: 

• Lufta për grurin shkakton tensione: Ukraina ngre tonet ndaj BE-së. SHBA akuza Rusisë
• U kualifikua për Lojërat Olimpike 2024, Luiza Gega flet për Euronews Albania