Rifillojnë seancat gjyqësore ndaj ish-krerëve të UÇK-së

Ish-krerët e Ushtrisë Çlirimtare të Kosovës do të dalin përsëri këtë të hënë para trupit gjykues në Gjykatën Speciale, ku do të vazhdojë procesi gjyqësor ndaj tyre. Seancat rikthehen pas një pushimi tre javor të Dhomave të Specializuara të Kosovës në Hagë.

Hashim Thaçi, Kadri Veseli, Jakup Krasniqi e Rexhep Selimi do të dëgjojnë dëshmitarin e radhës kundër tyre, të cilin e sjell Zyra e Prokurorit të Specializuar e cila i ngarkon ata me krime të pretenduara të luftës.

Ky do të jetë dëshmitari i gjashtëmbëdhjetë me radhë ndërsa ende nuk dihet nëse do të dëshmojë nën masa mbrojtëse sigurie apo me identitet të fshehur.

Deri tani, në këtë proces gjyqësor të gjithë dëshmitarët janë dëgjuar në seanca private, përveç dëshmisë së ish-komandantit të Zonës Operative të Llapit, Rrustem Mustafa, dhe dëshmisë së një oficeri britanik.

Gjykimi ndaj Thaçit dhe të tjerëve ka nisur me 3 prill ku të gjithë janë deklaruar të pafajshëm për akuzat për krime të pretenduara të luftës, ndërsa ndodhen në qendrën e paraburgimit në Hagë prej nëntorit të vitit 2020.

LEXONI GJITHASHTU:

• Ish-pjesëtar i UÇK-së, kush është ministri i ri i Mbrojtjes në Kosovë
• Musk zbulon detaje nga ndeshja me Mark Zuckerberg: Do jetë në një vend epik