“Rrugët më problematike”, Berberi detaje për situatën në vend për shkak të reshjeve

Evis Berberi, drejtor i ARRSH-së, ka treguar se si është situata në vend për shkak të reshjeve të shumta të shiut, të cilat kanë përfshirë Shqipërinë që prej ditës së djeshme.

I ftuar në emisionin “Good Morning Albanians” në Euronews Albania, Berberi bëri me dije se problematika të mëdha ka pasur në rrugët sekondare në të gjithë vendin.

Në Shqipërinë e Mesme ai tha se erërat kanë qenë të forta dhe reshjet e shiut më të pakta, ndryshe nga zonat në veri.

“Për shkak të intensitetit të madh të reshjeve, problematika ka pasur në zonën e Veriut,  në Vermosh, Bogë, Milot, Burrel, Skuraj. Kemi pasur daljen e Bërdicës në zonën Shkodrës.

Ndërsa në zonën e Shqipërisë së Mesme kemi pasur rënie pemësh; reshjet e shiut kanë qenë me intensitet më të ulët, por era ka qenë shumë më e fortë. Në të gjithë Shqipërinë, akset sekondare kanë pasur problematika të mëdha”- shprehet ai.

Berberi tha se qytetarët nuk janë të rrezikuar.

“Në të gjitha akset nacionale ne kemi patrulla që lëvizin pa ndërprerje në të gjithë aksin”- nënvizoi ai.

LEXONI GJITHASHTU: 

• Moti i keq në Shkodër: Bllokohet hyrja e qytetit, dëmtohet ura e vjetër dhe e re
• Rrjedha e ujit mori para makinën, trupat e babë e bir ende nuk janë gjetur