Seanca për buxhetin 2025, PD depoziton 36 amendamente, Berisha rikthehet në Kuvend

Nga aksioni i ashpër me karriget e djegura dhe bllokim të seancave plenare, Partia Demokratike ka ndryshuar qasjen e saj duke e ndërtuar aksionin e saj mbi bazën e propozimeve kundër buxhetit për vitin 2025 të sjellë nga mazhoranca socialiste.

Plot 36 amendamente janë depozituar nga deputetët e Partisë Demokratike për buxhetin, të cilat do të shqyrtohen në seancën plenare të kësaj të martë ku pritet që të kalojë nen për nen buxheti për vitin e ardhshëm.

Propozimet e PD prekin thuajse të gjitha fushat e jetës, me një vëmendje të veçantë në kërkesën për rritjen e mbështetjes për pensionistët.

Sipas grupit parlamentar demokrat, këto amendamente në buxhet bëhen me qëllimin që ai të mos jetë buxheti i mirëqenies së një grupi njerëzish pranë qeverisë, por të jetë buxheti i qytetarëve dhe që siguron mirëqenien minimale të tyre.

Kjo është hera e parë që PD paraqet në Kuvend një listë kaq të gjatë me projektligje dhe amendamente në buxhetin e shtetit dhe shikohet si hapi i parë i ndërtimit të një alternative qeverisëse të opozitës për zgjedhjet e ardhshme të pranverës 2025.

E veçanta e seancës të së martës do jetë rikthimi i kreut të PD Sali Berisha pasi GJKKO vendosi ta lirojë nga arresti i shtëpiak.

LEXONI GJITHASHTU:

• Berisha i lirë…/Juristi: Vendimi do mbetet në fuqi pavarsisht rekursit të SPAK
• Berisha: Buxheti i miratuar injoron totalisht qytetarët