Serbia mban seancë për zgjedhjen e Qeverisë së re

Në Kuvendin e Serbisë po mbahet sot seanca për votimin e përbërjes së Qeverisë së re, me Gjuro Macut si mandatar për formimin e kabinetit. Në propozimin e dorëzuar më 14 prill, përfshihen 30 ministra, nga të cilët 10 janë emra të rinj në skenën qeveritare.

Në fjalimin e tij para deputetëve, Macut theksoi se qëllimi kryesor i kabinetit të tij do të jetë funksionimi i plotë i institucioneve dhe kapërcimi i ndarjeve politike e sociale në vend. “Serbia është e lodhur nga ndarjet dhe bllokadat. Askush nuk guxon të ketë më shumë të drejta se tjetri,” u shpreh ai.

Macut foli edhe për protestat e kohëve të fundit, të cilat i cilësoi si shprehje legjitime e pakënaqësisë rinore, por kundërshtoi bllokimin e institucioneve dhe kufizimin e të drejtave të të tjerëve. Ai nënvizoi se prioriteti i tij i parë është funksionimi i shkollave dhe universiteteve, si dhe garantimi i të drejtës për arsimim dhe lëvizje për të gjithë qytetarët.

Mandatari kërkoi nga ministrat që të jenë “më pranë popullit dhe me popullin”, duke shtuar se Qeveria e re duhet të jetë më efikase dhe më lëvizshme në shërbim të qytetarëve.

Votimi për kabinetin pritet të zhvillohet gjatë ditës së sotme në Kuvendin e Serbisë.

LEXONI GJITHASHTU:

• Formohet komisioni për verifikimin e mandateve të deputetëve në Kosovë
• Haradinaj: Qëndrimi i opozitës, të mos marrë pjesë në zgjedhjen e kreut të Kuvendit