SHBA paralajmërojnë se qyteti kyç i Ukrainës mund të bjerë në duart e Rusisë

Shtetet e Bashkuara kanë paralajmëruar se Rusia mund të pushtojë qytetin kyç lindor të Ukrainës, Avdiivka – skena e disa prej luftimeve më të ashpra në muajt e fundit.

“Avdiivka rrezikon të bjerë nën kontrollin rus”, tha zëdhënësi i Këshillit të Sigurisë Kombëtare, John Kirby, duke përmendur mungesën e municioneve në Ukrainë.

Presidenti ukrainas Volodymyr Zelensky u zotua të bëjë gjithçka për të “shpëtuar sa më shumë jetë ukrainase”.

Trupat ruse kanë arritur përfitime në Avdiivka, duke kërcënuar se do ta rrethojnë atë.

Qyteti – i cili është shkatërruar pothuajse plotësisht – shihet si një portë për në Donetsk aty pranë, kryeqyteti rajonal ukrainas i pushtuar nga luftëtarët e mbështetur nga Rusia në 2014 dhe më vonë i aneksuar në mënyrë të paligjshme nga Moska.

Presidenti rus Vladimir Putin filloi një pushtim të plotë të Ukrainës më 24 shkurt 2022.

Në konferencën e së enjtes në Uashington, Kirby tha se Avdiivka mund të bjerë kryesisht “sepse forcave ukrainase në terren po u mbarojnë municionet e artilerisë”.

“Rusia po dërgon valë pas valë forcash të rekrutuar për të sulmuar pozicionet e Ukrainës”, tha ai.

“Dhe për shkak se Kongresi nuk e ka miratuar ende projektligjin shtesë, ne nuk kemi qenë në gjendje t’i ofrojmë Ukrainës predhat e artilerisë që i duhen dëshpërimisht për të ndërprerë këto sulme ruse.

“Forcat ruse po arrijnë tani llogoret ukrainase në Avdiivka dhe po fillojnë të mposhtin mbrojtjen e Ukrainës”.

LEXONI GJITHASHTU:

• Stoltenberg shpreson në zhbllokimin e ndihmës amerikane për Ukrainën
• Analiza e gazetarit: Pse Blinken nuk takoi asnjë aktor nga opozita