Shembja e ujëmbledhësit në Himarë: Prezencë e madhe uji në biznese e baza ushqimore

Këtë të enjte rreth orës 12:26, është shembur ujëmbledhësi i Sasajt në Bunec, të bashkisë Himarë e cila ishte ndërtuar në vitin 2010. Kjo shembje ka shkaktuar përhapjen e rreth 15.000 metra kub ujë ku për pasojë në 12 biznese në zonë ka prezencë të ujit dhe baltës.

Ndërkaq, është dëmtuar dhe baza ushqimore e blegtorisë në dy familje. Bëhet me dije se fatmirësisht, nuk raportohet për të lënduar.

Aksi rrugor Bunec-Piqeras është bërë i kalueshëm pas ndërhyrjeve të menjëhershme, ndërkohë që strukturat e bashkisë Himarë po punojnë intensivisht për pastrimin e baltës dhe për normalizimin e situatës.

Nga ana tjetër, për shkak të çarjes së hidrocentralit kanë mbetur pa energji elektrike disa fshatra si Borsh, Qeparo, Lukovë, Shën Vasil. Uji ka hyrë në nënstacionin elektrik të zonës deri në 1 metër duke detyruar të stakojnë energjinë elektrike.

Ministria e Mbrojtjes, Agjencia Kombëtare e Mbrojtjes Civile dhe Forcat e Armatosura janë përherë në gatishmëri, në ndihmë të komunitetit.

LEXONI GJITHASHTU:

• VIDEO| Çahet diga e hidrocentralit në Himarë, rrezik për përmbytje
• Balluku: KKDM të ketë rol më aktiv te digat! Kaskada e Drinit, kryevepër arti