Avokati i Popullit në Maqedoninë e Veriut Naser Ziberi kërkon sjelljen urgjente të një ligji që do të garantonte përqindjen e pëlqyeshme për punësimin e shqiptarëve në institucionet shtetërore të vendit.
Sipas tij, pas shfuqizimit të Balancuesit që ishte një mekanizëm për të siguruar punësimin edhe të shqiptarëve, janë krijuar kushtet për refuzimin e punësimit të shtetasve shqiptarë.
“Informacionet tona flasin se ka devijime nga ky përcaktim kur nuk respektohet kjo e drejtë. Prandaj apeloj deri te Qeveria, Parlamenti, që sa më shpejtë të tejkalohet kjo zbrazëtirë juridike. Të sillet ligji aq i proklamuar për përfaqësimin e drejtë dhe adekuat. Dhe me këtë të pamundësohet procesi i deformimit të implementimit të përcaktimit kushtetues për përfaqësim të drejtë dhe adekuat”, tha Naser Ziberi, Avokat i Popullit në RMV.
Ziberi kërkon nga Gjykata Kushtetuese të mos bëjë politikë por të udhëhiqet nga Kushtetuta.
Balancuesi” ishte një mekanizëm softuerik i vendosur pas Marrëveshjes së Ohrit të vitit 2001, me qëllim të promovimit të barazisë etnike në institucionet publike. Ai siguronte që përfaqësimi etnik në sektorin publik të përputhej me përqindjen e popullsisë. Por Gjykata Kushtetuese më 9 tetor të vitit 2024 e shfuqizoi atë duke argumentoi se binte ndesh me parimin kushtetues të barazisë dhe ndalimit të diskriminimit, pasi përkatësia etnike nuk duhet të jetë kriter për punësim.
