Shkupi pret Spanjën, formimi i qeverisë spanjolle i hap rrugë RMV-së në NATO

Formimi i Qeverisë spanjolle sjell shpresa në Shkup për ratifikimin protokollit për anëtarësimin e Maqedonisë së Veriut në NATO.

Spanja është vendi i vetëm nga 29 shtetet e NATO-s, i cili akoma nuk ka ratifikuar këtë protokoll, për shkak të krizës politike atje.

Pritjet janë që protokolli të hyjë në rend dite në parlamentin spanjoll deri në fund të janarit.

 Më pas duhet që protokolli të ratifikohet edhe në parlamentin e Maqedonisë së Veriut, para 11 shkurtit, kur është edhe data e shpërbërjes së kësaj përbërje parlamentare. Me përmbylljen e kësaj procedure, Maqedonia e Veriut automatikisht bëhet anëtare e NATO-s, pa pasur nevojë për të pritur një tjetër samit.

Nënshkrimi i Marrëveshjes së Prespës mes Greqisë dhe Maqedonisë së Veriut u pa si një nga arritjet më pozitive për të dyja vendet.

Me këtë marrëveshje, Maqedonia e Veriut i hapi rrugë vetes për anëtarësim në organizmat euroatlantike, ku deri para një viti, kjo qasje mbahej e bllokuar nga shteti grek për shkak të emrit.