Shpërthimi në një servis në Luz të Fushë-Krujës, arrestohet autori i dyshuar

Policia e Krujës ka vënë në pranga 34-vjeçarin Ervin Shera, i dyshuar si autor i vendosjes së një lënde plasëse në derën e një servisi automjetesh në fshatin Luz, ngjarje e ndodhur më 28 shtator.

“Shtetasi E. Sh., 34 vjeç, banues në fshatin Zezë, u kap dhe u arrestua si rezultat i hetimeve intensive, të kryera në bashkëpunim me Prokurorinë”, thuhet në njoftimin zyrtar të policisë.

Sipas uniformave blu, gjatë operacionit u sekuestrua motori që dyshohet se është përdorur në ngjarje, si dhe telefoni celular i të dyshuarit.

Servisi ku ndodhi shpërthimi është në pronësi të Alfred Gurrës, i cili ka bërë kallëzim në polici pasi ka konstatuar dëmtimin në qepen. Burime pranë tij bëjnë me dije se Gurra ka mohuar të ketë konflikte me ndonjë person.

Nga shpërthimi janë shkaktuar vetëm dëme të vogla materiale, ndërkohë që hetimet vijojnë për të përcaktuar motivin e ngjarjes. Materialet i janë referuar Prokurorisë për veprime të mëtejshme.

LEXONI GJITHASHTU:

• Eksploziv makinës së kryetarit të Njësisë Administrative Fushë-Krujë 
• Ahmeti nga Fushë Kruja në Real People&Rrëfimi i një jete me plot pasione e sfida