Shqipëria synon të hyjë në tregun e biokarburanteve për të mbrojtur mjedisin

Shqipëria po synon të hyjë në tregun e biokarburanteve për të qenë në linjë me një nga direktivat e Bashkimit Evropian për mbrojtjen e mjedisit.

Hedhja e këtij hapi kushton minimalisht 3 herë më shumë se karburanti që tregtohet aktualisht. Shqetësimi për projektligjin e paraqitur nga Ministria e Infrastrukturës dhe Energjisë u shpreh fillimisht nga Shoqata e Karburanteve të Shqipërisë.

“Biokarburanti ka një çmim 3-4 herë më shtrenjtë se nafta normale”- tha Luigj Aliaj, President i Shoqatës së Karburanteve.

“Çmimi në total do të rritet rreth 20% apo jo? Sepse ky 10 për qindëshi është 2-3 herë, apo 3-4 herë më i shtrenjtë”,  theksoi Niko Peleshi, kryetar i Komisionit për Veprimtaritë Prodhuese

 “Vendet të cilat përdorin më shumë biokarburante, në një moment të caktuar mund të kenë një rritje të çmimit të karburantit.”, theksoi Ilir Bejtja, zv. Ministër i Infrastrukturës dhe Energjisë.

Sipas ligjit, karburantet që tregtohen aktualisht do të përzihen me 10% biokarburant, ky i fundit mund të sigurohet vetëm nëpërmjet importit, pasi Shqipëria nuk ka kapacitetet prodhuese për to.

Në Komisionin për Veprimtaritë Prodhuese, Shoqata e Karburanteve kërkoi heqjen e akcizës për të shmangur një rritje të mëtejshme të çmimit të karburantit. Sipas saj, efekti në ekonomi do jetë zero, pasi do të vilen të ardhura nga TVSH-ja.

Shoqata theksoi se ligji nuk parashikon detyrimin e kompanisë importuese që të lëshojë certifikim të përqindjes së biomasës në karburant.

Kjo mund t’i hapte udhë abuzimeve pasi nuk do dihej përqindja reale e biomasës në karburantin e importuar, por Ministria e Infrastrukturës dhe Energjisë i garantoi se ky problem do të rregullohet me Vendim të Këshillit të Ministrave.