Shtyhet seanca për ndryshimet kushtetuese në RMV, s’u arritën 2/3-at e votave

Në Kuvendin e Maqedonisë së Veriut u zhvillua dje seanca për ndryshimin e Kushtetutës, konkretisht për futjen e bullgarëve në Kushtetutë.

Por, votimi i nevojës për ndryshimin e Kushtetutës u shty për një moment të dytë, pasi qeveria nuk kishte dy të tretën e votave të nevojshme.

Rendi i ditës për debatin u votua më 70 vota pro dhe 47 kundër.

Kryeministri Dimitar Kovaçevski provoi të bindë deputetët për të fundit herë që të votojnë pro ndryshimeve kushtetuese. Ai theksoi se këto ndryshime kanë vetëm një qëllim, zhbllokimin e procesit eurointegrues të vendit.

Deputetët e pushtetit dhe opozitës kishin qëndrime dhe kërkesa të ndryshme. Deputeti i BDI-së, Arbër Ademi kërkoi nga deputetët që të votojnë pro pasi siç tha shërbime të huaja po kërkojnë të realizojnë ëndrra të shekullit të kaluar.

Halil Snopçe, nga Aleanca për Shqiptarët u tha deputetëve se ashtu siç po bëhet kërkesa për ndryshimin e Kushtetutës, të kërkohet edhe ndryshimi i “gjuhës që e flasin 20%, me gjuhën shqipe”.

Për votimin e nevojës së ndryshimit të Kushtetutës, duhet të votojnë 80 deputetë. Për këtë Kuvendi ka 10 ditë kohë. Ndërkaq, ndryshimi i Kushtetutës deri tani është bërë 8 herë.

LEXONI GJITHASHTU:

• Valëviti “Shqipërinë e Madhe”, policia në RMV në kërkim të autorit
• Ndryshimet kushtetuese në RMV/ Gashi: Nëse nuk janë 80 vota të shkojmë në zgjedhje