Siguria në rajon/ Mali i Zi dhe RMV i kundërpërgjigjen deklaratave të ministrit serb

Reagime të forta kanë mbërritur nga Mali i Zi dhe Maqedonia e Veriut për deklaratat e ministrit serb të Mbrojtjes, Millosh Vuçeviç që krahasoi veprimet e Shkupit dhe Podgoricës zyrtare kur kanë njohur Kosovën, me veprimet që ka kryer më herët Ukraina, duke thënë se pasojat do të jenë të njëjta.

I pari që reagoi përmes një postimi në rrjetin social Twitter ishte presidenti malazez, Jakov Milatoviç, i cili i cilësoi si të papranueshme çdo përpjekje për të ndërhyrë drejtpërdrejt ose indirekt nga aktorë të jashtëm në krijimin e Qeverisë në Mal të Zi.

“Pres që formimi i Qeverisë së 44-të të bazohet në vullnetin e shprehur lirshëm të qytetarëve në zgjedhjet e kaluara parlamentare, si dhe në prioritetet programore që do të mundësojnë anëtarësimin e përshpejtuar të Malit të Zi në BE, rritjen e standardit jetësor dhe ndërtimi i shtetit të së drejtës”,-tha Jakov Milatoviç, president i Malit të Zi

Sakaq, Shkupi zyrtar reagoi përmes ministrit të Jashtëm, Bujar Osmani i cili duke i quajtur këto deklarata si të papërshtatshme theksoi se Maqedonia e Veriut është për paqe në rajon.

“Maqedonia e Veriut refuzon ndërhyrjen dhe vërejtjet e papërshtatshme nga zyrtarët fqinjë. Ne qëndrojmë për stabilitet dhe bashkëpunim rajonal, duke përfshirë Serbinë dhe Kosovën. Në pritje të sqarimit nga ministri i Mbrojtjes i Serbisë”,-tha Bujar Osmani, ministër i Jashtëm i Maqedonisë së Veriut.

Më herët gjatë ditës së djeshme, përmes rrjeteve sociale reagoi edhe kryeministri i Shqipërisë, Edi Rama i cili tha se deklarata të tilla janë të rrezikshme dhe se nuk mund të lejohet që rajoni i Ballkanit të kthehet pas.

LEXONI GJITHASHTU:

• Greqi, evakuohet spitali ndërsa zjarri intensifikohet në Aleksandropolis
• Nga mungesa e Ramës, tek prezenca e Zelenskyt. “Surprizat” në darkën e Athinës