Situata me reshjet, Osmani: Organet e rendit ndodhen në terren

Pas përkeqësimit të gjendjes nga vërshimet në qytete të ndryshme të Kosovës, ka reaguar Presidentja e vendit, Vjosa Osmani.

Ajo shprehu mirënjohje të thellë për të gjitha institucionet dhe qytetarët, të cilët, siç thotë ajo, reagojnë me përgjegjësi, profesionalizëm dhe solidaritet në mbrojtjen e jetës dhe pronës.

“Sot gjatë ditës kam qenë në komunikim me kryetarët e komunave të prekura, të cilët po udhëheqin menaxhimin e situatës në terren në koordinim të ngushtë dhe me mbështetjen e institucioneve qendrore”, tha Osmani.

Më tej, presidentja shpreh mirënjohje edhe ndaj Forcës së Sigurisë së Kosovës.

“Agjencia për Menaxhimin e Emergjencave po punon pareshtur bashkë me organet e rendit. Falënderoj edhe Forcën e Sigurisë së Kosovës për gatishmërinë e plotë për ofrimin e mbështetjes së menjëhershme, duke vënë në dispozicion kapacitetet e saj njerëzore dhe logjistike, nëse paraqitet nevoja.

Situata kërkon kujdes maksimal. U bëj thirrje qytetarëve të tregojnë vigjilencë dhe të respektojnë me përpikëri udhëzimet e institucioneve kompetente. Bashkëpunimi i ngushtë dhe reagimi profesional mbeten vendimtare për përballimin me sukses të kësaj situate”, shkruan Osmani.