Skenarët e protestës së PD, ç’pritet të ndodhë në tubimin e demokratëve para SPAK

Protesta e radhës e Partisë Demokratike këtë të mërkurë do të zhvillohet para Prokurorisë së Posaçme Anti-Korrupsion.

Thirrja e strukturave të demokratëve në këtë tubim u bë fill pas njoftimit të thirrjes së Sali Berishës dhe dhëndrit të tij, Jamarbër Malltezi në SPAK për t’u njohur me akuzën për çështjen e kompleksit Partizani.

Burime të Euronews Albania bëjnë me dije se protesta e së mërkurës do të jetë e organizuar kryesisht nga strukturat e PD-së në Tiranë dhe qyteteve përreth, por jo në përmasat e një tubimi kombëtar si ai që u organizua në korrik në bulevard.

Mësohet se protesta do të zgjasë aty që nga momenti kur do të mbërrijë Berisha e deri kur para prokurorëve të SPAK të paraqitet dhëndri i tij, Jamarbër Malltezi.

Skenari paraprak i protestës nuk parashikon akte të dhunshme, por një demonstrim qëndrese dhe besnikërie ndaj Sali Berishës, me shpresën se pasi ky i fundit të mësoje akuzën të mund të kërkojë lirimin dhe mundësinë për të lënë arrestin shtëpiak, masë të cilën e vuan që prej 31 dhjetorit 2023.

Gjithsesi ky është një variant që do duhet të presë të paktën disa ditë të tjera pas marrjes së akuzës, pasi do të jetë Gjykata ajo që do të shprehet nëse Berisha do qëndroj në shtëpi gjatë kohës që do jetë me statusin e të pandehurit, apo do të jetë me ndonjë masë më të lehtë.

LEXONI GJITHASHTU:

• Noka pas mbledhjes së drejtuesve politikë të qarqeve të PD: Do ketë protesta masive!
• Berisha në SPAK, demokratët organizohen në protestë. SMS-ja në grupet e anëtarësisë