Skulptorja: Kam biseduar me protestuesin që qëndroi këmbëkryq në ’90-tën

Skulptorja 20 vjeçare, Eliza Shala, ka befasuar të gjithë në Sheshin “Zahir Pajaziti” kur me 28 nëntor prezantoi një skulpturë të një personaliteti që ishte bërë i njohur përmes një fotografie të famshme të marsit të vitit 1990.

Bëhet fjalë për Faik Rexhepin, i cili në protestën e asaj kohe kishte vendosur që të rrinte këmbëkryq para forcave ushtarake serbe që ushtronin dhunë të pashembullt ndaj kosovarëve që protestonin kundër shtypjes. Zbulimi i bustit është bërë të hënën pasdite teksa ai titullohet “Këmbëkryq”.

E ftuar në emisionin “Goodmorning Albanians” në Euronews Albania, skulptorja u shpreh se ka kontaktuar me vetë protestuesin, ku ka marrë dhe pëlqimin e tij.

Shala tha se Rexhepi është dhunuar nga policia jugosllave për faktin që ul këmbëkryq gjatë asaj proteste.

“Kam hulumtuar, sepse kam dashur të di më shumë rreth historisë së kësaj fotoje; gjithashtu para se ta nis, kam rënë në kontakt me vetë Faikun. Kemi marrë pëlqimin e tij për ta realizuar, është emocionuar. Në fakt, për shkak se Faiku është në gjendje jo shumë të mirë, kemi biseduar me gruan e tij dhe është emocionuar goxha shumë dhe ajo; na ka treguar për historinë e asaj dite dhe uljen e tij në mes të protestës. Ka qenë një reagim i momentit. E ka rrahur policia pasi është ulur”, tha Shala.

LEXONI GJITHASHTU:

• Edhe pak me “Mythodea”-n, ekspozita e skulptorit Arben Bajo hapur deri më 12 nëntor
• Drogën e kanë kaluar edhe me skulptura, thotë Ervin Karamuço