SPAK sekuestron inceneratorin, Basha: Hapi i duhur kundër megaskandalit korruptiv

Pas sekuestrimit të inceneratorit të Tiranës nga ana e SPAK ka reaguar edhe kryetari i Partisë Demokratike Lulzim Basha. Ai shkruan se sekuestrimi i inceneratorit fantazëm të Tiranës është një hap i duhur për zbardhjen e këtij megaskandali korruptiv.

Kreu i PD ka përshëndetur punën e bërë nga SPAK dhe i ka inkurajuar që të të veprojnë pa asnjë hezitim kundër korrupsionit në nivelet e larta.

“Përshëndes vendosmërinë e SPAK për hetimin e thelluar të aferës së shekullit, e cila u kushton takaspaguesve shqiptarë më shumë se 430 milionë euro.

Sekuestrimi i inceneratorit fantazëm të Tiranës është një hap i duhur për zbardhjen e këtij megaskandali korruptiv.

Shpreh mbështetjen e plotë dhe inkurajoj institucionet e drejtësisë të veprojnë pa asnjë hezitim kundër korrupsionit në nivelet e larta, kësaj gangrene që shkatërron vendet e punës dhe mirëqenien e shqiptarëve.

Qytetarët shqiptarë presin dhe meritojnë drejtësi, ata e dinë mirë që peshku qelbet nga koka!”

Prokuroria e Posaçme kundër Krimit të organizuar dhe Korrupsionit ka vendosur këtë të martë sekuestrimin e inceneratorit të Tiranës.

Përmes një komunikate zyrtare për media, SPAK pohon se pas hetimeve të kryera rezulton se pronarë “de facto” edhe në impiantin e përpunimit të mbetjeve në Tiranë, janë shtetasit Mirel Mërtiri dhe Klodian Zoto.

Sipas SPAK, Klodian Zoto dhe Mirel Mërtiri kanë përdorur persona dhe shoqëri të tjera për të fshehur gjurmët si pronarët e vërtetë të shoqërisë koncesionare “Integrated Energy B.V SPV” sh.p.k.

LEXONI GJITHASHTU:

• SPAK sekuestron inceneratorin e Tiranës
• “Do të vras”- Dhunoi dhe kanosi me armën të ëmën, arrestohet 44-vjeçari