Spitalet në Ukrainë pa energji, OBSH: Komplekset mjekësore jashtë funksionit

Me trishtim dhe indinjatë, drejtori rajonal i OBSH-së për Evropën vizitoi të enjten disa spitale në Dnipro të Ukrainës.

Doktor Hans Kluge, i cili çoi atje ndihma mjekësore, i cilësoi një shkelje të pastër të ligjit ndërkombëtar rreth 700 sulmet ndaj komplekseve mjekësore që nga fillimi i luftës. Por shqetësimi i tij kryesor ishin bombardimet kundër infrastrukturës energjetike.

“Tani temperatura luhatet rreth zero gradë Celsius, por shumë shpejt ajo do të bjerë në minus 20. Aktualisht ka një blackout në të gjithë qytetin. Si mund të funksionojë një spital pa elektricitet? Si mund të funksionojë një maternitet pa inkubatorë, pa magazinë për vaksinat dhe pa frigoriferë?”, u shpreh Kluge.

Bombardimet masive të ushtrisë ruse ndaj infrastrukturës energjetike të Ukrainës kanë lënë disa milionë njerëz në errësirë. Në shumë qytete nuk ka elektricitet, ujë të pijshëm dhe as ngrohje.

Në Kiev, që u godit rëndë të mërkurën, 70 për qind e popullsisë ishte ende pa elektricitet mëngjesin e së enjtes.

Qeveria ukrainase e ka quajtur këtë bombardim një krim kundër njerëzimit dhe ka hapur mbi 4 mijë pika ngrohjeje në mbarë vendin. Në këto pika, njerëzit mund të ngrohen, të bisedojnë, apo të rimbushin telefonët e tyre.

LEXONI GJITHASHTU

• Kremlini: Ukraina mund t’i japë fund vuajtjeve të popullit duke përmbushur kërkesat
• Polonia i kërkon Gjermanisë të dërgojë raketa “Patriot” në Ukrainë
• ‘Gati të paguajmë çmimin’, Stoltenberg për mbështetjen e Ukrainës: Është një detyrim