Starmer dënon sulmin në Mançester: Do shtohen masat e sigurie në të gjithë Britaninë

Kryeministri britanik, Sir Keir Starmer, ka dënuar ashpër sulmin e ndodhur mëngjesin e së enjtes në Sinagogën Heaton Park në Crumpsall, Mançester, ku dy persona humbën jetën dhe katër të tjerë mbetën të plagosur.

Sulmi, i kryer me makinë dhe më pas me thikë, ndodhi rreth orës 09:30 BST, pikërisht në ditën e shenjtë të Yom Kippur, çka e bën ngjarjen edhe më tronditëse për komunitetin hebre. Sulmuesi u qëllua për vdekje nga policia në vendngjarje.

“Jam thellësisht i tronditur. Fakti që kjo ndodhi në Yom Kippur e bën edhe më të tmerrshme”, u shpreh Starmer, ndërsa falënderoi shërbimet e emergjencës për ndërhyrjen e shpejtë dhe shprehu ngushëllimet për familjet e viktimave.

Kryeministri ndërpreu pjesëmarrjen në samitin e Komunitetit Politik Evropian në Kopenhagen për të kryesuar një takim urgjent të komitetit COBR. Ai njoftoi se do të vendosen masa shtesë sigurie dhe më shumë patrulla policore në sinagogat në të gjithë Mbretërinë e Bashkuar.

Ndërkohë, edhe Mbreti Charles III reagoi përmes një deklarate, duke u shprehur “thellësisht i tronditur dhe i trishtuar” nga ngjarja. Ai dhe Mbretëresha Camilla u shprehën pranë familjeve të prekura dhe vlerësuan veprimet e shpejta të shërbimeve të emergjencës.

LEXONI GJITHASHTU:

• Starmer dënon sulmin në Mançester: Do shtohen masat e sigurie në të gjithë Britaninë
• “Reagim ndaj provokimit”, Putin: Do t’i përgjigjemi miliarizimit histerik të Evropës