Strehoi 22 emigrantë të paligjshëm në banesë, arrestohet 44-vjeçari

Një 44-vjeçar është arrestuar nga policia e Shkodrës, pasi në banesën e tij në fshatin Boriç i Madh kishte strehuar 22 shtetas nga vendet e treta, që synonin të kalonin ilegalisht kufirin.

Dyshohet se 44-vjeçari në bashkëpunim me 3 shtetas nga Kosova, të shpallur në kërkim, kryenin transportin e emigrantëve të paligjshëm drejt vendeve të BE-së.

Në cilësinë e provës materiale u sekuestruan automjeti tip “Benz” me targa kosovare, që dyshohet se përdorej për këtë veprimtari kriminale.

Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.

“Specialistët për Hetimin e Trafiqeve të Paligjshme të DVP Shkodër, pas shkëmbimit të informacioneve me shërbimet e DVKM Shkodër dhe të Komisariatit të Policisë Malësi e Madhe, për një rast të tentativës për dhënie ndihmë emigrantëve nga Vendet e Treta, për kalim të paligjshëm të kufirit, kanë organizuar dhe finalizuar operacionin policor të koduar “Danubi 9”.

Si rezultat i operacionit, u arrestua shtetasi A. L., 44 vjeç, banues në fshatin Boriç i Madh.

Ky shtetas kishte strehuar në banesën e tij, 22 shtetas nga Vendet e Treta, të cilët do t’i ndihmonte, kundrejt pagesës, që të kalonin ilegalisht kufirin.

Në vijim të veprimeve u shpallën në kërkim shtetasit: A. K, 36 vjeç, S. O., 37 vjeç dhe B. S., 39 vjeç, të tre banues në Gjilan, Kosovë, të dyshuar si bashkëpunëtorë në këtë veprimtari kriminale.

Në cilësinë e provës materiale u sekuestruan automjeti tip “Benz” me targa kosovare, që dyshohet se do përdorej për transportimin e emigrantëve”, thuhet në njoftimin e policisë.

LEXONI GJITHASHTU:

• “Shqipëria si Ruanda”- Marrëveshja për emigrantët, Zhulali: Larg standarteve të BE
• “Emigrantët do burgosen” – Flet deputeti italian që protestoi kundër Melonit