Tabaku pas raportit të DASH: Lufta ndaj korrupsionit, të jetë prioritet kombëtar

Deputetja e Partisë Demokratike Jorida Tabaku ka reaguar me anë të një postimi në Facebook rreth raportit të publikuar më herët nga DASH ku ngrihej shqetësimi se në Shqipëri korrupsioni dhe paraja informale po bëhen pengesë dhe po inkurajojnë investitorët e huaj, të cilët shqetësohen se në vendin tonë nuk do të gjejnë një konkurrencë të ndershme.

Tabaku shkruan se raporti i DASH është një realitet që e përjetojnë bizneset dhe investitorët e huaj në terren. Ajo shkruan se Shqipëria ka nevojë për një qeveri që të sigurojë siguri dhe politika fiskale pro biznesit për të tërhequr investitorët e huaj pasi kjo do të ndihmonte në zhvillimin e vendit.

“Skaneri i investimeve dhe investitorëve sot bëhet nga raporti i DASH përtej çdo propagande qeveritare. Raporti është një realitet që e përjetojnë në terren bizneset e investitorët e huaj.

Shqipëria ka përjetuar një rritje të numrit të investitorëve nga SHBA, por raporti i Departamentit të Shtetit vërteton se klima e biznesit dhe mikpritja e biznesit janë ende të vështira për shkak të problematikave të pazgjidhura për më shumë se një dekadë.

Fakt: Sipërmarrjet në vend hasin në një sistem të korruptuar që promovon monopole dhe oligarki, duke bërë këtë vend pak tërheqës për investitorët e huaj.

Fakt: Ligji Investimeve Strategjike favorizon vetëm një grup të vogël biznesesh lokale dhe jo investitorët e huaj.

Fakt: Skema e PPP-ve (Partneriteti Publiko-Privat) është ideuar për të shfrytëzuar buxhetin e shtetit për të përfituar të korruptuarit në qeveri dhe ortakët e tyre, dhe jo për të përmirësuar cilësinë e shërbimeve për qytetarët.

Fakt: Politikat fiskale nuk ndihmojnë sipërmarrjen dhe bizneset, por përkundrazi lehtësojnë monopolet dhe oligarkët, duke ngarkuar me tatime dhe taksa 95% të bizneseve dhe shqiptarëve.

Fakt: Korrupsioni është një problem shqetësues, veçanërisht në prokurimet publike, dhe kjo situatë është vërtetuar nga raporti i Departamentit të Shtetit. Skemat e amnistisë fiskale përshkruhen si përfitime të paligjshme për të korruptuarit, duke ndikuar negativisht në qytetarët dhe sipërmarrjet e ndershme.

Shqipëria ka nevojë për një qeveri që të sigurojë siguri dhe politika fiskale pro biznes për të tërhequr investitorët e huaj. Sipërmarrësit strategjikë duhet të kenë mundësi të përfitojnë nga ekonomia e tregut dhe konkurrenca. Kjo do të ndihmonte në zhvillimin e vendit dhe në shfrytëzimin e mundësive ekonomike për të gjithë qytetarët dhe sipërmarrjet.

Nuk mund të sjellë ndryshim një qeveri dhe mazhorancë që ka sjellë këtë shkatërrim të sistemit e këtë mungesë gare e meritokracie. Prej dhjetë vitesh vazhdojnë të trajtojnë korrupsionin si një sajesë e opozitës, kur faktet flasin qartë dhe pastër për aferat që kanë përfshirë qeverinë.

Nuk mund të sjellë ndryshim një qeveri që refuzon propozimin e dërguar në Parlament nga Grupi Parlamentar i PD për të shpallur Luftën Kundër Korrupsionit si prioritet kombëtar dhe që refuzon të miratojë ligjet e propozuara nga ky grup kundër korrupsionit.

Lufta ndaj korrupsionit duhet të jetë prioritet kombëtar dhe rikthimi i besimit te institucionet duhet të udhëheqë çdo reformë ekonomike. Klima e biznesit me reforma që përmirësojnë tregun dhe luftojnë pastrimin e parave si dhe krijojnë një hapësirë monetare dhe tregtare me standarde të BE duhet të jenë emergjenca”,-shkruan Tabaku.

LEXONI GJITHASHTU:

• Raporti i DASH për biznesin: Shqetësim pastrimi i parave dhe koncesionet
• Kryesia e PD: Mbledhja e Këshillit, sajesë e Bardhit për arsye personale politike