Të hënën shpërndarja e bonueseve për pensionistët, Mete: Përfitojnë 700 mijë persona

Ministri i Financave Ervin Mete ka bërë të ditur me anë të një postimi në Facebook se rreth 700 mijë pensionistë do të përfitojnë nga bonusi i fundvitit. Në postimin e tij ai tha shkruan se që prej ditës së hënë pensionistët krahas pensionit mund të tërheqin edhe shpërblimin.

“Këshilli i Ministrave miratoi vendimin për shpërblimin e pensionistëve dhe personave të tjerë që përfitojnë trajtime financiare me bonusin e fundvitit, në masën 5 mijë lekë, me një fond total prej 3.5 miliardë lekësh.

Bonusi i fundvitit do të shpërndahet së bashku me pensionet mujore përgjatë muajit dhjetor nga Instituti i Sigurimeve Shoqërore. Shpërblimi mund të tërhiqet nga përfituesit edhe pas festave të fundvitit.

Ky është bonusi i dytë që jepet brenda këtij viti, pas atij të akorduar në muajin prill, nga i cili do të përfitojnë rreth 700 mijë pensionistë, por edhe kategori të tjera, që përfitojnë trajtime financiare.

Në tre vitet e fundit, për indeksimin e pensioneve janë alokuar 25 miliardë lekë, të cilat me buxhetin e parashikuar për vitin e ardhshëm arrijnë në afro 30 miliardë lekë dhe me efekt të përhershëm në buxhetin e shtetit”, shkruan ministri.