Të rinjtë e Unionit, pro zgjerimit të Bashkimit Europian

Më shumë se gjysma e të anketuarve të rinj në të gjithë Bashkimin Europian janë pro zgjerimit të mëtejshëm të bllokut me vende të tjera. Pothuajse një në dhjetë të të pyeturve shprehet shumë pro anëtarësimeve të reja, sipas studimit më të fundit të Eurobarometrit.

Në 23 shtete anëtare, të paktën 50% e të anketuarve janë pro zgjerimit të mëtejshëm, me mbështetjen më të lartë në Suedi (79%), Danimarkë (75%) dhe Lituani (74%). Ukraina, Mali i Zi, Bosnja dhe Hercegovina, Maqedonia e Veriut, Moldavia, Serbia, Gjeorgjia, Shqipëria, Kosova dhe Turqia janë dhjetë vendet që duan t’i bashkohen BE-së. Mbështetja është veçanërisht e lartë mes të rinjve. Të anketuarit më të rinj, të moshës 15 deri 24 vjeç, janë më shumë pro (67%), të pasuar nga ata të moshës 25 deri 39 vjeç (63%).

Pak më shumë se gjysma e të anketuarve në të gjithë BE-në shprehën mbështetjen e tyre për pranimin e Ukrainës në BE. Megjithatë, kërkesa e Ukrainës për t’u anëtarësuar është aktualisht e bllokuar për shkak të vetos së Hungarisë, e cila ka penguar gjithashtu përparimin e Moldavisë. Pas Ukrainës, Mali i Zi ka marrë 51% mbështetje për anëtarësim mes të anketuarve të BE-së dhe është kandidati më i preferuar në shtatë shtete anëtare.Shqipëria ka marrë 45% mbështetje nga qytetarët e BE-së. Bosnja dhe Hercegovina, Maqedonia e Veriut dhe Moldavia kanë marrë secila nga 48% mbështetje për pranimin e tyre. Në kontrast, Turqia nuk është identifikuar si kandidat i preferuar për anëtarësimin në BE nga asnjë shtet anëtar. Më pak se dy të pestat e të anketuarve do të mbështesnin anëtarësimin e Turqisë, edhe nëse ajo do të plotësonte kriteret e nevojshme.

Aryset se pse janë pro integrimit lidhen me ndikimin më të fortë të BE-së në botë dhe një treg më të madh për bizneset e BE-së. Në të njëjtën kohë, të anketuarit shprehën shqetësime për zgjerimin e ardhshëm të mundshëm të BE-së. Shqetësimi më i madh është migracioni i pakontrolluar, me 40%, i pasuar nga korrupsioni dhe krimi me 39% dhe kostoja financiare për taksapaguesit europianë me 37%.

LEXONI GJITHASHTU:

• ISHP: Ekspozimi ndaj metalit të plumbit, dëme në shëndetin e fëmijëve
• Alarmi i avokatëve: Pse qytetarët në Korçë po e humbin besimin te drejtësia