Tragjedia në Koçan, humb jetën futbollisti i Shkupit! Po ndihmonte të tjerët

Futbollisti Andrej Lazarov, 26 vjeç, i cili ishte në mesin e të lënduarve nga zjarri në diskotekën e Koçanit, fatkeqësisht humbi jetën në spitalin e Shtipit.

Përmes një postimi në rrjetet sociale FC Shkupi shkruan se u helmua nga tymi gjatë përpjekjeve të tij për të shpëtuar jetë.

Mesazhi i plotë:

Edhe pse paraprakisht nga familjarët e tij kishim informacione se është mirë, me dhimbje të thellë dhe pikëllim të madh, njoftojmë se futbollisti ynë, Andrej Lazarov, është konfirmuar mes viktimave të zjarrit tragjik që ndodhi gjatë natës në Koçan.

Si një shpirt hero që ishte, Lazarov humbi jetën duke u përpjekur të ndihmojë të tjerët të shpëtojnë nga ambienti i kapluar nga zjarri. Ai u helmua nga tymi gjatë përpjekjeve të tij për të shpëtuar jetë, duke treguar guxim dhe humanizëm deri në momentin e fundit. Veprimi i tij heroik do të mbetet gjithmonë në kujtesën tonë, si një dëshmi e karakterit të tij fisnik dhe zemrës së tij të madhe. Kjo është një humbje e madhe për klubin tonë, për shokët e ekipit dhe për gjithë komunitetin e futbollit. Fjalët janë të pakta për të përshkruar dhimbjen që ndjejmë në këto momente, në këtë tragjedi prej më të mëdhave në histori që e ka kapluar klubin tonë!

FC Shkupi i shpreh ngushëllimet më të sinqerta familjes së tij, të afërmve dhe gjithë familjes së madhe të klubit tonë. Adrej ishte vetëm gjashtë muaj pjesë e Shkupit, por emri i tij do të mbetet i pashlyer gjithmonë si pjesë e skuadrës sonë. Kujtimi për te do të mbetet gjithmonë i paharruar në zemrat tona!”,-thuhet në postimin e klubit sportiv.

59 të rinj kanë humbur jetën në Maqedoninë e Veriut si pasojë e flakëve që kanë përfshirë një lokal nate. Ngjarja ka ndodhur rreth orës 03:00 të mëngjesit të 16 marsit, në një klub nate, si pasojë e flakëve 155 të tjerë kanë mbetur të plagosur. Në diskotekë ishin rreth 1500 të rinj, duke ndjekur një performance nga bendi maqedonas DNA, një grup i famshëm vendas.

LEXONI GJITHASHTU:

• Tragjedia në Koçan, mes viktimave drejtori i Qendrës Kulturore në Shtip
• Vlorë| Goditet aktiviteti kriminal për shfrytëzim prostitucioni, dy të arrestuara