Energjia, Rama: Mbetemi në tregje të vogla nëse s’shkojmë përtej kufijve

“Na duhet të rajonalizojmë tregjet tona dhe të shkojmë përtej kufijve”, kështu u shpreh në Beograd kryeministri Rama, i cili mori pjesë në konferencën për energjinë e rinovueshme.

Energjia bëri bashkë në Beograd 5 nga 6 liderët e ballkanit perëndimor në konferencën mbi mundësitë në zhvillimin e energjisë së rinovueshme me iniciativë të qeverisë serbe dhe asaj norvegjeze.

Për kryeministrin Rama kur veprohet në mënyrë rajonale edhe qasja në financime për të mbështetur Ballkanin perëndimor është më e lehtë. Për Ramën takimi shërbeu për të konceptuar një master plan rajonal dhe një udhërrëfyes investimesh.

“Na duhet të rajonalizojmë tregjet tona dhe sa i takon energjisë, na duhet të shkojmë përtej kufijve tanë pasi në të kundërt, ende mbetemi tregje të vogla. Ajo çfarë na duhet e për të cilën kemi nevojë, nëse trajtohet në mënyrë të izoluar mund të jetë shumë më tepër e kushtueshme dhe jo vetëm kaq”- u shpreh Rama.

Ndërsa për presidentin serb, Aleksandër Vuçiç do të duhet të ndryshojmë strukturën e sektorit të energjisë që të kemi më shumë burime të rinovueshme.

“Na duhet edhe një reformë edhe më e vështirë në sektorin e energjisë për sa i përket edhe sektorit financiar dhe fiskal sepse duhet të ndryshojmë vetën që të sigurojmë një të ardhme më të mirë”- tha Vuçiç.

Kryeministri Rama tha se në Shqipëri ka 2 projekte të reja me të cilat po punohet, njëra impianti lundrues i energjisë diellore në Devoll dhe tjetra një sistem për të prodhuar energji përmes ujit.

LEXONI GJITHASHTU: 

• Energjia nuk shtrenjtohet, Balluku: Fasha 800 kwh s’do të aplikohet as për nëntorin
• Sa kushton rritja e një fëmije?
• Partia e Lirisë kërkon nga SPAK të nisë hetimet për Aeroportin e Vlorës