Turistët shpenzuan 2.5 mln € në Korçë, në fund të 2024 u prenotuan 4000 shtretër

Qyteti i Korçës dhe rrethinat e saj janë të preferuara në çdo stinë, por gjatë festave të fundvitit gjetja e një dhome për tu akomoduar kthehet në mision të pamundur. Kjo situatë krijohet për faktin se kërkesat janë maksimale.

“Vetëm përgjatë 10 ditëve të fundit të 2024, në qytetin e Korçës dhe fshatrat turistikë të Boboshticës, Dardhës e Voskopojës janë harxhuar minimalisht 2.5 milionë euro. Gjithashtu operatorët turistikë, për shkak të fluksit të vizitorëve kanë shtuar kapacitetet akomoduese.”

Fatmir Ceci, specialist i ekonomisë shprehet se duke marrë një përllogaritje minimale për një person, rezulton që brenda 10 ditëve të jenë harxhuar mbi 2.5 milion euro.

“Gjatë fundvitit dihet që Korça ka fluks të turistëve. Sipas llogaritjeve, të paktën në 10 ditë, me 4000 shtretër që ka Korça Plus për një individ marrim 50 euro, kanë hyrë 2 milion euro, por duke llogaritur restorantet, blerjet, shkon deri në 2.5 milion euro. Faktikisht, flasim për shifra reale një individ në Korçë me fjetje ushqim, harxhon 5 mijë lek të reja”,- tha Fatmir Ceci, ekonomist.

Ceci shton se numri i vizitorëve në Korçë është në trend rritës, çka ka detyruar operatorët turistikë kryesisht atyre të hoteleve të shtojnë numrin e dhomave dhe të shtretërve.

“Korça ka një trend dhe shtim të akomodimeve, në përgjithësi kjo sasi e madhe e investimeve ka sjellë e ne cilësi e ne rritjen e numrit të turistëve por korçarët janë të kujdesshëm në çmime. Mbajnë çmime të arsyeshme, kjo ka sjellë që Korça ta ketë “boom” të vizitorëve”,-tha ekonomisti.

Shifrat zyrtare nga ana e bashkisë së Korçës tregojnë se ky qytet dhe fshatrat turistikë gjatë vitit 2024 janë vizituar nga mbi gjysmë milioni turistë, shifër që pritet të jetë më e lartë këtë vit, për shkak të zhvillimeve në infrastrukturë.

LEXONI GJITHASHTU:

• “Iluzione bashkëshortore” në ArtTurbina, “Dhelprat e vogla” në Teatrin e Metropolit
• Meloni “merr drejtimin” e Evropës: E gatshme të përmirësoj marrëdhëniet SHBA-BE