Ukraina kërkon armë moderne për zmbrapsjen e trupave ruse

Artileria ruse dhe sulmet ajrore rrezikojnë të ndryshojnë fatin e luftës në lindje të Ukrainës.

Autoritetet vendase deklarojnë se u duhet urgjentisht një sistem i avancuar amerikan raketash për të ndalur avancimin rus në Luhansk dhe Donjeck.

Raketat do të ishin në gjendje të godisnin pozicionet e njësive ruse, bazat ushtarake dhe linjat e furnizimit në një rreze prej 300 km.

“Çdo ditë po punojmë për të përforcuar mbrojtjen tonë. Çdo ditë po i afrohemi një situate kur ushtria jonë do të dominojë ndaj pushtuesve në aspektin teknologjik dhe në atë ushtarak. Sigurisht, shumë gjëra varen nga partnerët tanë, nga gatishmëria e tyre për të pajisur Ukrainën me gjithçka që duhet për të mbrojtur lirinë. Presim lajme të mira nga java e ardhshme”, tha Zelensky.

Fushat veriore të ndotura nga bombat e pashpërthyera janë shumë të rrezikshme për t’u kaluar. Ndërsa në ferma, pajisjet dhe magazhinat janë të shkatërruara.

Ndërkohë, kriza ushqimore është përkeqësuar nga paaftësia e Ukrainës për të eksportuar tonelata drithëra dhe produkte agrikulturore.

Bllokimi që Rusia i ka bërë porteve të saj ka ndalur shumicën e lëvizjes, duke vënë në rrezik të gjithë botën. Gjithashtu, shumica e porteve janë tashmë të minuar.

Pavarësisht kësaj, një anije e shoqatës “Open Arms” me 24 tonë ushqim ndaloi në qytetin Izmail të rajonit të Odesës.

Ndërkohë, porti i Mariupolit rifilloi operacionet ditën e shtunë, pasi forcat ruse deklaruan se përfunduan çminimin e ujërave të qytetit.

LEXONI GJITHASHTU:

• Ambasadori rus: Rusia nuk do përdorë armë bërthamore kundër Ukrainës