UNESCO thirrje për mbrojtje të trashëgimisë kulturore në Ukrainë

UNESCO ka bërë thirrje për mbrojtje të monumenteve të trashëgimisë kulturore në Ukrainë, pas pushtimit të paprovokuar nga Rusia.

“Ne duhet të ruajmë trashëgiminë kulturore në Ukrainë, si një dëshmi e së kaluarës, por edhe si një katalizator për paqen për të ardhmen, të cilën komuniteti ndërkombëtar ka për detyrë ta mbrojë dhe ruajë”, tha drejtoresha e përgjithshme e UNESCO-s Audrey Azoulay.

Që nga fillimi i luftës 14 ditë më parë, Organizata e Kombeve të Bashkuara për Arsim, Shkencë dhe Kulturë (UNESCO) ka qenë në kontakt të vazhdueshëm me institucionet ukrainase për të vlerësuar situatën dhe për të forcuar mbrojtjen e monumenteve të trashëgimisë kulturore.

“Sfida e parë është shënimi i vendeve dhe monumenteve të trashëgimisë kulturore dhe rikujtimi i statusit të tyre të veçantë si zona të mbrojtura sipas ligjit ndërkombëtar,” tha Azoulay.

Me ndihmën e imazheve satelitore, UNESCO po përpiqet të monitorojë dëmet e shkaktuara nga Rusia në vendet e mbrojtura të trashëgimisë kulturore në Ukrainë.

UNESCO konfirmoi gjithashtu mbështetjen për punonjësit e kulturës në Ukrainë.

Ministrat e kulturës të BE-së më 7 mars siguruan gazetarët dhe artistët ukrainas për ndihmë, duke thënë se do të mbështesin profesionistët në mënyrë që ata të vazhdojnë të jenë aktivë dhe të ruajnë lirinë e kreativitetit të tyre.

LEXONI GJITHASHTU: 

• Përditësime LIVE 9 mars: Rusia shpall armëpushim për evakuimin e civilëve