Ushqimet e ekspozuara në diell burim sëmundjesh, paralajmërojnë ekspertët

Tregtimi i fruta perimeve në ambiente të hapura, përtej çdo kushti higjieno-sanitar dhe në temperatura që i kalojnë 35 gradë në ditë, është kthyer në një fenomen shqetësues.

Qytetarët thonë se me rritjen e çmimeve, mundësitë për t’i blerë këto ushqime në supermarket janë të pakta. Ndaj detyrohen të shkojnë tek ai tregtar që i shet më lirë.

“Fruta-perime me thënë të drejtën blej shumë pak, për shkak të vapës, por dhe të shtrenjta, edhe sallatë shumë rrallë”, thotë një qytetar.

“Të gjitha i kam blerë se të gjitha do hahen. Tërë ditën në diell, ata mundohen të shkretët, po kushtet nuk janë kush e di se çfarë, më të mira duhet të ishin, por jetojmë në Shqipëri”, shprehet një tjetër.

Nutricionistët thonë që konsumimi i këtyre produkteve është i dëmshëm për shëndetin. Ndaj u bëjnë thirrje qytetarëve të tregohen të kujdesshëm në blerjet e tyre.

“Ka rrezikshmëri të lartë nga salmonela. Duhet të konsumojmë perimet dhe frutat e stinës. Qytetarë duhet të tregojnë kujdes”, thotë  Entela Cenko, nutricioniste.

AKU për muajin maj ka kryer 2871 inspektime në shkallë vendi, vetëm në tregjet e licencuara. Ndaj ata bëjnë thirrje që qytetarët të tregohet kujdes me shitësit ambulantë.