Pasi Gjykata e Apelit la në fuqi vendimin me një vit burg ndaj deputeit Ervin Salianji me akuzën “Kallëzim i rremë”, këtë të premte kreu i Grupit Parlamentar të Partisë Demokratike, Gazment Bardhi ka paraqitur një kërkesë për mbledhje urgjente të Këshillit të Mandateve.

Në kërkesën e tij drejtuar kryeparlamentares Elisa Spiropali thuhet se ky vendim i gjykatës së faktit cënon parimet bazë të shtetit të së drejtës dhe krijon një situatë alarmante të goditjes politike ndaj opozitës.

Kjo sepse sipas Bardhit, deputeti nuk mund të arrestohet, t’i hiqet liria në cfarëdo lloj forme apo ndaj tij të ushtrohet kontroll personal ose i banesës, pa autorizimin e Kuvendit.

Kërkesa e plotë:

“Znj. Kryetare e Kuvendit,

Me një akt hakëmarrës politik,  Gjykata e Apelit e Juridiksionit të Përgjithshëm, me vendim të datës 26 Shtator 2024, ka urdhëruar burgusjen e një deputeti të Kuvendit të Shqipërisë, një zyrtari të opozitës, kolegut Ervin Salianji, për një krim të pakryer dhe për një cështje të fabrikuar nga segmente të caktuara të Policisë së Shtetit dhe Prokurorisë. Ky akt politik dhe që cenon themelet e shtetit demokratik, prek integritetin e Kuvendit të Shqipërisë dhe cenon mandatin e një deputeti të opozitës.

Po në një procedurë ekstra ligjore, pa autorizim të Kuvendit, me një nxitim të pa shpjegueshëm, Prokuroria po ndjek procedurën për arrestimin e deputetit të opozitës. Sipas nenit 73, pika 2, “Deputeti nuk mund të arrestohet ose t’i hiqet liria në cfarëdo llojë forme, apo ndaj tij të ushtrohet kontroll personal ose i banesës, pa AUTORIZIMIN e Kuvendit”. Këto veprime të organeve të drejtësisë, që cënojnë parimet bazë të shtetit të së drejtës, kanë krijuar një situatë alarmante të goditjes politike ndaj opozitës. Dënimi pa ligj e prova i deputetëve të opozitës, duke shpërfillur autoritetin e Kuvendit të Shqipërisë, duke shkelur në mënyrë flagrante Kushtetutën e Republikës së Shqipërisë, duke mos arsyetuar masat represive ndaj deputetëve të opozitës, është akt i paprecedentë në një shtet demokratik.

Për këtë arsye, në përputhje me nenin 73, pika 2 e Kushtetutës, dhe nenit 13 të Rregullores, kërkojmë mbledhjen urgjente të Këshillit për Rregulloren, Mandatet dhe Imunitetin, për të rivendosur autoritetin e Kuvendit të Shqipërisë, frenimin e akteve politike ndaj deputetëve të Kuvendit të Shqipërisë, dhe rikthimin e kushtetutshmërisë.”

LEXONI GJITHASHTU:

• Thirret në SPAK prokurori i Tiranës, bashkëshorti i deputetes socialiste
• Kryesia e PD merr vendimin: Protesta e parë në 6 tetor